СБОРНИКИ И ПРОИЗВЕДЕНIЯ НЕИЗВѢСТНЫХЪ АВТОРОВЪ
Послѣдованіе въ недѣлю Православія
По прочтеніи часовъ стоящу Архіерею на обыкновенномъ мѣстѣ въ облаченіи исходятъ отъ олтаря Архимандриты, Игумены, Священники и Діаконы: Священники же износятъ икону Спасителеву и Богородичну, и полагаютъ среди церкви на аналогіи. (Аще же нѣсть Архіерея и творится чинъ Молебнаго Пѣнія объ обращеніи заблудшихъ, по окончаніи литургіи исходятъ священнослужащіи отъ олтаря, и сотворше поклоны 3, начинаютъ оное Пѣніе якоже и самое Послѣдованіе Православія; вездѣ разумѣй тогда далѣе вмѣсто Архіерея — предстоятеля, а вмѣсто Протодіакона — Діакона).
Протодіаконъ начинаетъ: Благослови, Владыко.
Архіерей: Благословенъ Богъ нашъ:
Ликъ: Аминь. И поютъ: Царю Небесный:
Чтецъ: Трисвятое: Господи помилуй (12). Пріидите поклонимся: и псаломъ 74.
Слава и нынѣ: Аллилуіа (3).Діаконъ чтетъ ектенію обычную даже до О плавающихъ: и абіе прилагаетъ сію:
О еже милостивымъ окомъ призрѣти на Святую Свою Церковь и соблюсти ю невридиму и непреобориму отъ ересей и суевѣрій и миромъ Своимъ оградити, Господу помолимся.
О еже утишити раздираніе Ея, и силою Святаго Духа обратити всѣхъ отступлшихъ къ познанію истины, и сопричести къ избранному Своему стаду, Господу помолимся.
О еже просвѣтити мысли, невѣріемъ помраченнымъ, свѣтомъ Своего Богоразумія: вѣрныхъ же Своихъ укрѣпити и непоколебимыхъ въ правовѣріи соблюсти, Господу помолимся.
О избавитися намъ: и дальше.
По семъ: Богъ Господь и явися намъ: гласъ 4.
Благодарни суще недостойніи рабы Твои, Господи, о Твоихъ великихъ благодѣяніяхъ на насъ бывшихъ, славяще Тя хвалимъ, благословимъ, поемъ, и величаемъ Твое благоутробіе, и рабски любовію поемъ Ти: Благодѣтелю, Спасе нашъ, слава Тебѣ.
Слава: гласъ 3.Твоихъ благодѣяній и даровъ туне, яко раби непотребни сподоблшеся, Владыко, къ Тебѣ усердно притекающе, благодареніе по силѣ приносимъ и Тебѣ, яко Благодѣтеля и Творца славяще, вопіемъ: слава Тебѣ, Боже прещедрый.
И нынѣ: гласъ 4.Якоже вышнія тверди благолѣпіе, и нижнюю споказалъ еси красоту святаго селенія славы Твоея, Господи, утверди сіе во вѣкъ вѣка, и пріими наша въ немъ непрестанно приносимая Тебѣ моленія Богородицею, всѣхъ Животе и Воскресеніе.
Сіе поемъ въ недѣлю Православія. Во иныхъ же потребныхъ случаехъ, егда творится Молебное Пѣніе объ обращеніи заблудшихъ, на И нынѣ: поемъ тропарь Пятидесятницы: Благословенъ еси, Христе Боже нашъ, Иже премудры ловцы явлей, низпославъ имъ Духа Святаго, и тѣми уловлей вселенную, человѣколюбче, слава Тебѣ.
Протодіаконъ: Вонмемъ.
Архіерей: Миръ всѣмъ.
Чтецъ: И духови твоему.
Протодіаконъ: Премудрость, вонмемъ.
Чтецъ: Прокименъ, гласъ 4: Насаждени въ дому Господни, во дворѣхъ Бога нашего процвѣтутъ. Стихъ: Возвеселится праведникъ о Господѣ, и уповаетъ на Него.
Апостолъ къ Римляномъ, зачало 121.
Евангеліе отъ Матѳея, гл. 18, зачало 75.
По семъ: Помилуй насъ, Боже, по велицей милости Твоей, молимся Ти, услыши и помилуй.
По: Еще молимся о Православномъ Епископствѣ Церкви Россійскія:
Не хотяй смерти грѣшныхъ, но ожидаяй обращенія и покаянія, обрати всѣхъ отступлшихъ, къ святѣй Твоей Церкви, молимтися, милосердный Господи, услыши и помилуй.
Устроивый міръ сей въ славу Твою, сотвори да и противящыяся Твоему слову обратятся, и вкупѣ со всѣми вѣрными истинною вѣрою, и благочестіемъ Тебе Бога нашего прославятъ, молимтися, всемилосердный Творче, услыши и помилуй.
Давый заповѣдь Твою намъ, еже любити Тебе Бога нашего и ближняго своего, сотвори, да ненависти, вражды, обиды, мздоимства, клятвопреступства, и протчая беззаконія прекратятся, истинная же любовь да царствуетъ въ сердцахъ нашихъ, молимтися, Спасителю нашъ, услыши и милостивно помилуй.
Архіерей, возгласъ: Услыши ны, Боже Спасителю нашъ:
Ликъ: Аминь.
Протодіаконъ: Господу помолимся.
Ликъ: Господи помилуй.
Молитва:Всевышній Боже, Владыко и Содѣтелю всея твари, наполняяй вся величествомъ Твоимъ, и содержай силою Твоею! Тебѣ вседаровитому Господу нашему мы недостойніи благодареніе приносимъ, яко не отвращаешися насъ беззаконій ради нашихъ: но паче предваряеши ны щедротами Твоими. Ты ко избавленію нашему послалъ еси единороднаго Твоего Сына, и благовѣстилъ безмѣрное Твое къ роду человѣческому снизхожденіе: яко хотѣніемъ хощеши, и ожидаеши, еже обратитися намъ къ Тебѣ, и спасенными быти: Ты снизходя къ слабости и немощи нашего естества, укрѣпляеши насъ всесилною Святаго Твоего Духа благодатію, утѣшаеши спасителною вѣрою, и совершенною надеждою вѣчныхъ благъ, и руководствуя избранныхъ Твоихъ въ горній Сіонъ, соблюдаеши яко зѣницу ока. Исповѣдуемъ, Господи, великое Твое и безприкладное человѣколюбіе и милосердіе. Но видя многихъ поползновенія, прилежно Тя, всеблагій Господи, молимъ: призри на Церковь Твою, и виждь: яко Твое спасителное благовѣстіе аще и радостно пріяхомъ, но терніе суеты и страстей творитъ оное въ нѣкіихъ малоплодно, въ нѣкіихъ же и безплодно, и по умноженію беззаконій овіи ересьми, овіи расколомъ противяся евангельской Твоей истинѣ, отступаютъ отъ достоянія Твоего, отрѣваютъ Твою благодать, и повергаютъ себя суду Твоего Пресвятаго Слова. Премилосердный и всесильный, не до конца гнѣваяйся Господи, буди милостивъ, молитъ Тя Твоя Церковь, представляя Тебѣ Началника и Совершителя спасенія нашего, Іисуса Христа. Буди милостивъ имъ, укрѣпи ихъ въ правовѣріи силою Твоею, просвѣти имъ разумныя очи свѣтомъ Твоимъ божественнымъ, да уразумѣютъ Твою истину, умягчи ихъ ожесточеніе, отверзи слухи, да познаютъ гласъ Твой и обратятся къ Тебѣ Спасителю нашему. Исправи, Господи, оныхъ развращеніе и жизнь несогласную христіанскому благочестію: сотвори, да вси свято и непорочно поживемъ: и тако спасителная вѣра укоренится, и плодоносна въ сердцахъ нашихъ пребудетъ. Не отврати лица Твоего отъ насъ, Господи, воздаждь намъ радость спасенія Твоего, подаждь, Господи, и пастыремъ Церкви Твоея святую ревность, и попеченіе объ ихъ спасеніи, и обращеніи заблуждающихъ, духомъ евангельскимъ раствори: да тако вси руководими достигнемъ, идеже совершеніе вѣры, исполненіе надежды, и истинная любовь: и тамо съ лики чистѣйшихъ небесныхъ Силъ прославимъ Тебе Господа нашего, Отца, и Сына, и Святаго Духа, во вѣки вѣковъ, аминь.
Преступи Молебному Пѣнію.По семъ протодіаконъ, ставъ на уготованномъ мѣстѣ, возглашаетъ:
Кто Богъ велій яко Богъ нашъ, Ты еси Богъ творяй чудеса единъ.
Таже повысшимъ гласомъ: Кто Богъ велій яко Богъ нашъ:
И паки высочайшимъ гласомъ: Кто Богъ велій яко Богъ нашъ:
Православія день празднующе, православніи людіе, наипаче прославимъ Виновника всѣхъ благъ Бога, иже Сый благословенъ во вѣки. Сей Богъ нашъ, промышляя и утверждая возлюбленное Свое достояніе, святую Церковь, праотцевъ, преступленіемъ отпадшихъ, утѣшая неложнымъ Своимъ словомъ, еще въ Раи основаніе Ей положи: Сей Богъ нашъ, руководствуя ко оному спасительному обѣтованію, не несвидѣтельствована Себе остави, но хотящее быти спасеніе провозвѣстилъ первѣе чрезъ праотцевъ и пророковъ, живописалъ различными образы: Сей Богъ нашъ многочастнѣ и многообразнѣ древлѣ глаголавый отцемъ во пророцѣхъ, въ послѣдокъ дній сихъ глагола намъ въ Сынѣ, Имже и вѣки сотвори, Иже возвѣсти Отчее о насъ благоволеніе, откры таинства небесная, увѣри силою Святаго Духа о Истинѣ благовѣстія, посла Апостолы во весь міръ проповѣдати Евангеліе Царствія, утверди оное различными силами и чудесы.
Сему спасительному Откровенію послѣдующе, сего Благовѣстія держащеся, вѣруемъ во Единаго Бога Отца Вседержителя, Творца небу и земли, видимымъ же всѣмъ и невидимымъ. И во Единаго Господа Іисуса Христа, Сына Божія, Единороднаго, Иже отъ Отца рожденнаго прежде всѣхъ вѣкъ: Свѣта отъ Свѣта, Бога истинна отъ Бога истинна, рожденна, несотворенна, единосущна Отцу, Имже вся быша. Насъ ради человѣкъ и нашего ради спасенія сшедшаго съ небесъ и воплотившагося отъ Духа Свята и Маріи Дѣвы, и вочеловѣчшася. Распятаго же за ны при Понтійстѣмъ Пилатѣ, и страдавша, и погребенна. И воскресшаго въ третій день по Писаніемъ. И возшедшаго на небеса, и сѣдяща одесную Отца. И паки грядущаго со славою судити живыхъ и мертвыхъ, Егоже Царствію не будетъ конца. И въ Духа Святаго, Господа, животворящаго, Иже отъ Отца исходящаго, Иже со Отцемъ и Сыномъ споклоняема и сславима, глаголавшаго пророки. Во едину святую, соборную и Апостольскую Церковь. Исповѣдую едино крещеніе во оставленіе грѣховъ. Чаю воскресенія мертвыхъ. И жизни будущаго вѣка. Аминь.
Сія Вѣра Апостольская, сія Вѣра Отеческая, сія Вѣра Православная, сія Вѣра вселенную утверди.
Еще же соборы святыхъ Отецъ, и ихъ преданія и писанія Божественному Откровенію согласная, пріемлемъ и утверждаемъ.
Аще сему Господню о насъ промышленію и откровенію спасителному врази Православія и противишася, но помяну Господь поношенія рабъ Своихъ: хульники бо славы Своея поруга, и продерзатели и враги Православія боязненны и бѣжатели яви.
Якоже убо плѣняющихъ разумъ свой въ послушаніе Божественному Откровенію и подвизавшихся за Оное ублажаемъ и восхваляемъ: тако противящихся сей Истинѣ, аще ожидавшему ихъ обращенія и раскаянія Господу не покаяшася, Священному Писанію послѣдующе и первенствующія Церкве преданій держащеся, отлучаемъ и анаѳематствуемъ.
Таже яснѣйшимъ гласомъ глаголетъ:Отрицающымъ бытіе Божіе и утверждающымъ, яко міръ сей есть самобытенъ и вся въ немъ безъ промысла Божія и по случаю бываютъ, Анаѳема! [2]
И возглашаетъ Архіерей со всѣмъ клиромъ: Анаѳема, трижды, таже пѣвцы или людіе возглашаютъ Анаѳема, трижды. И бываетъ сіе по коемждо анаѳематствованіи.
Таже протодіаконъ:Глаголющымъ Бога не быти духъ, но плоть; или не быти Его праведна, милосерда, премудра, всевѣдуща, и подобная хуленія произносящымъ, Анаѳема! (трижды).
Дерзающымъ глаголати, яко Сынъ Божій не единосущный и не равночестный Отцу, такожде и Духъ Святый, и исповѣдающымъ Отца, и Сына, и Святаго Духа не единаго быти Бога, Анаѳема! (трижды).
Безумнѣ глаголющымъ, яко не нужно быти ко спасенію нашему и ко очищенію грѣховъ пришествіе въ міръ Сына Божія во плоти, и Его вольное страданіе, смерть и воскресеніе, Анаѳема! (трижды).
Непріемлющымъ благодати искупленія Евангеліемъ проповѣданнаго, яко единственнаго нашего ко оправданію предъ Богомъ средства, Анаѳема! (трижды).
Дерзающымъ глаголати, яко Пречистая Дѣва Марія не бысть прежде рождества, въ рождествѣ и по рождествѣ Дѣва, Анаѳема! (трижды).
Невѣрующымъ, яко Духъ Святый умудри пророковъ и апостоловъ и чрезъ нихъ возвѣсти намъ истинный путь къ вѣчному спасенію, и утверди сіе чудесами, и нынѣ въ сердцахъ вѣрныхъ и истинныхъ христіанъ обитаетъ и наставляетъ ихъ на всякую истину, Анаѳема! (трижды).
Отмещущымъ безсмертіе души, кончину вѣка, судъ будущій и воздаяніе вѣчное за добродѣтели на небесѣхъ, а за грѣхи осужденіе, Анаѳема! (трижды).
Отмещущымъ вся таинства святая, Церковію Христовою содержимая, Анаѳема! (трижды).
Отвергающымъ соборы святыхъ Отецъ и ихъ преданія, Божественному Откровенію согласная, и Православно-Каѳолическою Церковію благочестно хранимая, Анаѳема! (трижды).
Помышляющымъ, яко православніи Государи возводятся на престолы не по особливому о нихъ Божію благоволенію и при помазаніи на царство дарованія Духа Святаго къ прохожденію великаго сего званія на нихъ не изливаются: и тако дерзающымъ противу ихъ на бунтъ и измѣну, Анаѳема! (трижды).
Ругающымъ и хулящымъ святыя иконы, ихже Святая Церковь къ воспоминанію дѣлъ Божіихъ и угодниковъ Его, ради возбужденія взирающихъ на оныя ко благочестію, и ко оныхъ подражанію пріемлетъ, и глаголющымъ оныя быти идолы, Анаѳема! (трижды).
Теософомъ и прочымъ еретикомъ, дерзающымъ глаголати и пребезумнѣ учити, яко Господь нашъ Іисусъ Христосъ не единожды на землю сниде и воплотися, но множицею воплощашеся, такождѣ и отрицающымъ, яко истинная премудрость Отчая есть Сынъ Его единородный и вопреки Божественному Писанію и ученію святыхъ Отецъ ищущымъ иныя премудрости, Анаѳема! (трижды).
Масономъ, оккультистомъ, спиритомъ, чародѣемъ и всѣмъ, иже не Единому Богу вѣруютъ, но бѣсовъ почитаютъ, и не Богу смиренно жизнь свою предаютъ, но чародѣйнымъ бѣсовь призываніемъ грядущее вѣдѣти тщатся, Анаѳема! (трижды).
Отступающымъ отъ Православныя вѣры и пріемлющымъ иныя исповѣданія на соблазнъ братіямъ нашимъ и отпадающымъ въ расколы, Анаѳема! (трижды).
Богопротивнымъ человѣкомъ злымъ, дерзнувшымъ даже и на убіеніе Помазанника Божія святаго Царя-мученика, Анаѳема! (трижды).
Гонителемъ Христовыя Церкви, нечестивымъ отступникомъ, подъявшимъ руки на священнослужителей Божіихъ, попираюшымъ святыни, разрушающымъ храмы Божіи, истязующымъ братію нашу и осквернившымъ Отечество наше, Анаѳема! (трижды).
Нападающымъ на Церковь Христову и учащымъ, яко Оная раздѣлися на вѣтви, яже разнятся своимъ ученіемъ и жизнію, и утверждающымъ Церковь не сущу видимо быти, но отъ вѣтвей, расколовъ и иновѣрій соединитися имать во едино тѣло; и онемъ, иже не различаютъ истиннаго священства и таинствъ Церкви отъ еретическихъ, но учатъ, яко крещеніе и евхаристіа еретиковъ довлѣютъ ко спасенію; и онемъ, иже имутъ общеніе съ сими еретики или пособствуютъ имъ, или защищаютъ ихъ новую ересь икуменизма, мняще ю братскую любовь и единеніе разрозненныхъ христіанъ быти, Анаѳема! (трижды).
Соблазнителемъ и ругателемъ рода человѣческаго и Богозданныя природы извратителемъ, сѣющимъ развратъ и надъ дѣторожденіемъ глумящымся, соблазняющымъ сестеръ нашихъ дѣтоубійство во утробахъ матернихъ творити и безвозрастныхъ младенцевъ, яко бездушныхъ извергати, еще же изъ ихъ тѣлесъ и крови скверную прибыль имати, Анаѳема! (трижды) [3].
Всѣмъ же о Православіи подвизавшымся словесы, писаніи, ученіи, страданіи и богоугоднымъ житіемъ, яко защитникомъ и пособникомъ онаго, Христова Церковь воспоминаніе творя, восклицаетъ:
Таже низкимъ и мѣрнымъ гласомъ: [4]Святому Благовѣрному и Равноапостольному Царю Константину и матери его Еленѣ, Ѳеодосію Великому, Ѳеодосію Юнѣйшему, Іустиніану и прочимъ православнымъ Царемъ и Царицамъ греческимъ, Вѣчная память.
И поютъ пѣвцы: Вѣчная память (трижды). Таже протодіаконъ паки:
Великимъ исповѣдникомъ Святыя Православныя Вѣры, святымъ: Аѳанасію Великому, Василію Великому, Григорію Богослову, Іоанну Златоустому, Льву Великому и Флавіану Исповѣднику, Отцемъ Седьми Вселенскихъ Соборовъ, преподобнымъ Максиму Исповѣднику, Марку Ефесскому и прочимъ Исповѣдникомъ, Отцемъ и Учителемъ Церкве, о Ней подвизавшымся, Вѣчная память (трижды).
Святому Благовѣрному и Равноапостольному Великому князю Владиміру, благовѣрнѣй велицѣй княгинѣ Ользѣ, Благовѣрнымъ Великимъ княземъ Ярославу Мудрому, Владиміру Мономаху, святому Александру Невскому, Димитрію Донскому и прочимъ Благовѣрнымъ Царемъ и Великимъ княземъ, царицамъ и княгинямъ, Благовѣрному Государю Царю Михаилу Ѳеодоровичу, убіенному Царю-Освободителю Александру Николаевичу, Царю-Миротворцу Александру Александровичу и святому Благовѣрному страстотерпцу Царю-Мученику Николаю, святымъ Благовѣрнымъ мученикомъ Царицѣ Александрѣ, Царевичу Алексѣю, Царевнамъ Ользѣ, Татьянѣ, Маріи и Анастасіи и всѣмъ отъ рода Царей и Великихъ князей Россійскихъ преставльшымся и съ ними же и убіенному Благовѣрному и Христолюбивому Государю и Кралю Югословенскому Александру и всѣмъ отъ рода православныхъ Царей, Королей и князей, Вѣчная память (трижды).
Всѣмъ святѣйшымъ Патріархомъ о Православіи подвизавшымся, Константинопольскимъ, Александрійскимъ, Антіохійскимъ, Іерусалимскимъ, Сербскимъ и Румынскимъ, и святѣйшымъ Патріархомъ Всероссійскимъ: Іову, священномученику Ермогену, Филарету, Іоасафу-Первому, Іосифу, Никону, Іоасафу-Второму, Питириму, Іоакиму, Адріану, священномученику Тихону Исповѣднику, святѣйшымъ Патріархомъ Димитрію, Варнавѣ и Гавріилу, и преосвященнымъ Митрополитомъ, Архіепископомъ и Епископомъ православнымъ, Вѣчная память (трижды).
Священномученикомъ Митрополиту Кіевскому Владиміру, Митрополитомъ Петроградскимъ Веніамину и Іосифу, Архіепископомъ Гермогену, Андронику и Митрофану; Епископу Никодиму; Митрополитомъ Петру, Кириллу, и Агаѳангелу; священномученикомъ во пресвитерѣхь Іоанну, Петру и Іоанну; преподобномученицамъ велицѣй княгинѣ Елисаветѣ и инокинѣ Варварѣ, вѣрнымъ сострадальцемъ мучениковъ Царственныхъ и всѣмъ безчисленнымъ святымъ и славнымъ Новомученикомъ и Исповѣдникомъ Церкве Россійскія, Сербскія и Китайскія, съ ними же и Архимандриту Филумену [5] и всѣмъ во всяцѣй странѣ мученически и исповѣднически пострадавшымъ, Вѣчная память (трижды).
Приснопамятнымъ святителемъ и чудотворцемъ Иннокентію, Митрополиту Московскому, просвѣтителю аборигеновъ Америки и Азіи; Николаю, Архіепископу и просвѣтителю Японскому и Іоанну, Архіепископу Шанхайскому и Санъ-Францисскому; Іонѣ, Епископу Ханькоускому и Манчжурскому; преподобному и богоносному отцу нашему Герману Аляскинскому; священномученику Ювеналію и мученику Петру Алеуту и всѣмъ отъ рода нашего бывшымъ и во иныя страны свѣтъ истинныя Вѣры принесшымъ, Вѣчная память (трижды).
Первоіерархомъ Русскія Православныя Зарубежныя Церкви, Блаженнѣйшымъ Митрополитомъ Антонію и Анастасію, Митрополиту Филарету, епископававшымъ во градѣ семъ Епископомъ (имя-рекъ — преставльшихся епархіальныхъ Архіереевъ, и всѣхъ подвизавшихся о Православіи преставльшихся Архіереевъ, ихже изволитъ помянуть Архіерей), и всѣмъ преосвященнымъ Митрополитомъ, Архіепископомъ и Епископомъ православнымъ, Вѣчная память (трижды).
Сященнослужителемъ и монашествующымъ, Христолюбивымъ княземъ, боляромъ, и христоименитому воинству на полѣ брани и въ разныхъ походѣхъ за Православную Вѣру и многострадальное Отечество наше пострадавшымъ и убіеннымъ, насильственно вывѣзеннымъ и умученнымъ, или въ изгнаніи скончавшымся, Вѣчная память (трижды).
Всѣмъ православнымъ христіаномъ во истинной Вѣрѣ и благочестіи и въ надеждѣ воскресенія скончавшымся, Вѣчная память (трижды).
Православная Христова Церковь, торжественно воспоминая подвизавшихся во благочестіи, и сіе всѣмъ Своимъ христоименитымъ чадомъ къ подражанію представляя, имѣетъ такождѣ долгъ восхвалять подвиги, иже нынѣ спасителною Вѣрою и добродѣтелно пріуготовляя себе къ вѣчному блаженству утверждаютъ Православіе.
По семъ возглашаетъ:Священному Архіерейскому Русскому Заграничному Синоду, господину нашему Высокопреосвященному Митрополиту Виталію, Первоіерарху Русскія Зарубежныя Церкве, господину нашему Преосвященному (Архіепископу или Епископу — имя рекъ, его же область), и господину Преосвященному (Архіепископу или Епископу — имя рекъ, аще есть викарный) съ клиромъ и паствою ихъ, Многая лѣта (трижды).
Православнымъ Первоіерархомъ Святыхъ Божіихъ Церквей, право правящымъ слово Истины, преосвященнымъ Митрополитомъ, Архіепископомъ и Епископомъ и всему освященному причту, Многая лѣта (трижды).
Всѣмъ, нынѣ здравствующымъ иже отъ Россійскаго Царственнаго Дома и отъ прочихъ православныхъ Царственныхъ и Королевскихъ Домовъ, Многая лѣта (трижды).
Благовѣрнымъ людемъ страждущія страны нашея Россійскія во всѣхъ тяжкихъ обстояніяхъ ихъ подаждь Господи на безбожническія козни крѣпость, отъ глада, губительства и междуусобныхъ браней, благочестія же во Отечествѣ нашемъ возставленіе и Многая лѣта (трижды).
Всѣмъ православнымъ христіаномъ право содержащымъ спасительную Вѣру, храмостроителемъ, благочестія ревнителемъ, и всѣмъ повинующымся Христовой Церкве, Многая лѣта (трижды).
Святая Троице, сихъ прослави и утверди даже до конца въ Правовѣріи: развратники же и хульники Православныя Вѣры и Христовы Церкве, и не повинующымся Онѣй, обрати, и сотвори, да пріидутъ въ познаніе вѣчныя Твоея Истины, молитвами Пресвятыя Владычицы нашея Богородицы, и Приснодѣвы Маріи, и всѣхъ Святыхъ. Аминь.
Твори Молебное Пѣніе.И по молитвѣ сей абіе Архіерей глаголетъ: Слава Тебѣ Богу, Благодателю нашему, во вѣки вѣковъ.
Ликъ: Аминь. И поетъ слѣдующую пѣснь святаго Амвросія: во время же пѣнія тоя Архіерее, Архимандрити, и все священное собраніе цѣлуютъ святыя иконы на аналогіахъ.
Тебе Бога хвалимъ: Тебе Господа исповѣдуемъ: Тебе превѣчнаго Отца вся земля величаетъ: Тебѣ вси ангели, Тебѣ небеса и вся силы, Тебѣ херувими и серафими непрестанными гласы взываютъ: святъ, святъ, святъ, Господь Богъ Саваоѳъ, полны суть небеса и земля величества славы Твоея. Тебѣ преславный апостольскій ликъ: Тебѣ пророческое хвалебное число: Тебе хвалитъ пресвѣтлое мученическое воинство, Тебе по всей вселенней исповѣдуетъ Святая Церковь, Отца непостижимаго величества: покланяемаго Твоего истиннаго и единороднаго Сына: и Святаго Утѣшителя Духа. Ты Царю славы, Христе: Ты Отца присносущный Сынъ еси, Ты ко избавленію пріемля человѣка, не возгнушался еси дѣвическаго чрева, Ты одолѣвъ смерти жало, отверзъ еси вѣрующимъ Царство Небесное, Ты одесную Бога сѣдиши во славѣ Отчей, Судія пріити вѣришися. Тебе убо просимъ: помози рабомъ Твоимъ: ихже честною Твоею кровію искупилъ еси. Сподоби со святыми Твоими въ вѣчной славѣ Твоей царствовати. Спаси люди Твоя, Господи, и благослови достояніе Твое: исправи я, и вознеси ихъ во вѣки: во вся дни благословимъ Тебе, и восхвалимъ имя Твое во вѣкъ, и во вѣкъ вѣка. Сподоби, Господи, въ день сей безъ грѣха сохранитися намъ: помилуй насъ, Господи, помилуй насъ, буди милость Твоя, Господи, на насъ, якоже уповахомъ на Тя. На Тя, Господи, уповахомъ, да не постыдимся во вѣки, аминь.
Таже бываетъ обыкновенный отпустъ, и абіе начинается литургія: аще же изволитъ Архіерей, послѣдованіе сіе бываетъ и предъ окончаніемъ литургіи предписаннымъ же образомъ.
* * *Полагаемъ полезнымъ привести и слѣдующую Анаѳему, принятую въ 1583 г. на соединенномъ Соборѣ Константинопольскаго, Александрійскаго и Іерусалимскаго патріархатовъ въ Царь-Градѣ подъ предсѣдательствомъ Святѣйшаго Іереміи Прославленнаго, Патріарха Константинопольскаго, и утвержденную всѣми четырьмя Восточными Патріархами и апокрисіаріемъ Московскаго Патріарха на послѣдующихъ соборахъ въ 1587 и 1593 годахъ:
Не слѣдующымъ обычаемъ Церкве, иже уставлены быша на Седми Вселенскихъ Соборѣхъ, такождѣ и Святѣй Пасцѣ и мѣсяцеслову, иже они правильно уставиша и предаша намъ на послѣдованіе, но желающымъ послѣдовать новоявленной пасхаліи и новому мѣсяцеслову безбожныхъ папскихъ астрономовъ; и, противясь онымъ обычаемъ [Церкви], желающымъ ниспровергнуть и развѣять догматы и обычаи Церкве, ихже мы отъ Отецъ пріяхомъ, Анаѳема! [6]
Мы призываемъ всѣхъ благочестивыхъ и православныхъ христіанъ: стойте твердо въ томъ, еже вы пріясте, въ онемъ же вы рождени бысте и на онемъ же вы вскормлени бысте, а егда время и обстояніе призовутъ къ тому, излейте самую кровь вашу, дабы сохранить и Вѣру, преданную намъ отъ Отецъ нашихъ и сохранить ваше исповѣданіе. Остерегайтесь таковыхъ людей и бдите, дабы Господь нашъ Іисусъ Христосъ споборалъ вамъ. Да будетъ благословеніе нашего смиренія на всѣхъ васъ. Аминь. [7]
Примѣчанія:
[1] Чинъ Торжества Православія совершается Святой Церковію въ первую недѣлю Великаго поста и установленъ въ память побѣды Церкви надъ еретиками и въ присное наученіе и предостереженіе чадамъ Церкви отъ погибельныхъ мечтаній и дѣяній. Текстъ приводится по «Послѣдованію въ недѣлю Православія», типографія Братства преп. Іова Почаевскаго, Монреаль, 1976 г. и свѣренъ съ московскимъ синодальнымъ изданіемъ 1797 г. Первыя 12 анаѳематствованій составляютъ послѣдованіе всей Вселенской Православной Каѳолической Церкви. Далѣе — дополнительное послѣдованіе Русской Православной Церкви Заграницей.
«Послѣдованіе молебнаго пѣнія о обращеніи заблудшихъ, пѣваемаго въ недѣлю Православія и во иныхъ потребныхъ случаехъ» приводится по санктъ-петербургскому синодальному изданію 1902 г. Постановленіе Св. Правительствующаго Синода, предписывающее обязательное совершеніе сего послѣдованія въ монастыряхъ, городскихъ и сельскихъ церквахъ въ недѣлю Православія, въ случаѣ невозможности совершить Послѣдованіе въ недѣлю Православія за отсутствіемъ архіерея, а также миссіонерами а) при отправленіи собесѣдованій съ раскольниками и сектантами; б) при возсоединеніи ими съ Православной Церковію обращающихся на путь истины; и в) предъ открытіемъ окружныхъ и епархіальныхъ съѣздовъ миссіонеровъ и иныхъ тому подобныхъ случаяхъ, также подтверждено Архіерейскимъ Синодомъ Русской Православной Церкви Заграницей.
[2] Анаѳема — буквально означаетъ поднятіе чего-либо отдѣльнаго. Св. Церковь Анаѳемой (иногда наз. проклятіемъ) опредѣляетъ полное отдѣленіе отъ Нея и отъ Собранія Своихъ вѣрныхъ до Втораго и Страшнаго Пришествія Господня, иными словами, объявляетъ анаѳематствуемаго чуждымъ Христу и Его Церкви и преданіе таковаго противника Бога и Церкви непосредственно на Судъ Господень (1 Кор. 16, 22).
Господь завѣщалъ Анаѳему только для грѣховъ ума, для грѣховъ противъ истины, для грѣховъ противъ Духа Святаго, но не противъ грѣховъ собственной воли, не противъ грѣхопаденій, покрываемыхъ покаяніемъ, но только противъ грѣховъ упорства и ожесточенія.
Анаѳема не означаетъ окончательнаго осужденія: до смерти возможно покаяніе и возвращеніе въ Церковь. Анаѳема страшна не потому, что Церковь желаетъ кому-либо худого, или потому, что Богъ желаетъ ихъ осужденія. Какъ Богъ, такъ и Его Св. Церковь желаютъ всеконечнаго спасенія абсолютно всѣхъ. Анаѳема страшна потому, что ужасно одному стоять предъ Богомъ въ состояніи заматорѣвшаго противленія Ему, во свидѣтельство каковаго богопротивнаго и бѣсовскаго одебелѣнія сердца и ума и изреp style=»text-align: justify»кается Анаѳема.
Св. Церковь провозглашаетъ Анаѳему только въ крайнемъ случаѣ, послѣ многихъ человѣколюбивыхъ увѣщеваній и призывовъ обратиться и покаяться, изрекаетъ ее уже на нераскаянныхъ и ожесточенныхъ сердцемъ грѣшниковъ, предавая послѣднихъ уже не Своему милосердному суду и заступленію, но въ руки Бога живаго, о каковомъ преданіи Апостолъ Святымъ Духомъ возвѣстилъ: Страшно есть еже впасти въ руце Бога Живаго, ибо Богъ нашъ Огнь поядаяй есть (Евр. 10, 31; 12, 29).
Приводимая ниже анаѳема 7-го Вселенскаго собора обыкновенно не входитъ какъ таковая въ совершаемый чинъ Торжества Православія, однако Типиконъ («О поклонѣхъ и молитвѣ церковное законоположеніе») указываетъ, что и она иногда провозглашается.
«Вся, кромѣ церковнаго преданія и ученія и изображенія святыхъ, и приснопамятныхъ Отецъ, обновляемая или посемъ содѣянная, Анаѳема» [Всѣму, помимо Церковнаго преданія, и ученія, и изображенія святыхъ и приснопамятныхъ Отцовъ вводимому или послѣ сего содѣянному, Анаѳема!]
[3] Сіе анаѳематствованіе возгла-шается лишь въ отдѣльныхъ соборахъ.
[4] Данный перечень поборниковъ Православія, которымъ возглашается «вѣчная память» и «многая лѣта», въ иныхъ епархіяхъ и Помѣстныхъ Церквахъ можетъ нѣсколько отличаться.
[5] Новосвященномученикъ Архимандритъ Филуменъ — въ 1979 г. ритуально убитъ іудеями-фанатиками въ монастырѣ Іерусалимской Патріархіи у колодца Патріарха Іакова въ г. Наблусъ на зап. берегу р. Іорданъ. Убійцы ворвались въ монастырь подъ покровомъ проливного дождя и, заставъ о. Филумена въ епитрахили готовящимся начать вечерню, крестообразно разрубили ему голову, а также отрубили пальцы правой руки, которыми священномученикъ пытался совершить крестное знаменіе. Убійцъ не нашли. Черезъ 4 года по погребеніи мощи обрѣтены нетлѣнными. Память 16/29 ноября.
[6] Приводится по тексту въ статьѣ д-ра Александра Каломироса «Является ли папство Церковію?», Typos, June & July, 1965. Оригинальный тексть Сигилліона 1583 г. содержится въ грамотѣ Кодексъ 772 библіотеки Свято-Пантелеимоновскаго монастыря на святой Горѣ Аѳонъ, а также въ грамотѣ Кодексъ 285 кельи «Акаѳистъ хваленія» святаго скита «Кафсокаливія» на Святой Горѣ Аѳонъ.
[7] Заключительное увѣщаніе соединеннаго патріаршаго Собора 1583 г. подъ предсѣдательствомъ Патріарха Константинопольскаго Іереміи Прославленнаго противъ пріобщающихся еретикамъ (католикамъ, вводящимъ новый калѣндарь и новые обычаи въ Христову Церковь и отступающимъ отъ Нея).
Печатается по изданію: Новый Маргаритъ или Святоотеческія наставленія о покаяніи, говѣніи исповѣди и христіанской жизни съ чиномъ Торжества Православія. — Калгари: Издательство «Кладезь», 1998. — С. 312-325, 369-371.